19 abril 2017

L'ARAGONÉS EN O CONCURSO DE LEUTURA EN PUBLICO


Iste mes hemos estato prou aqueferatos en o CEIP San Chuan de la Peña de Chaca, porque nos hemos presentato a ro Concurso de leutura en publico !!
Yera o segundo año que se podeban presentar leuturas en aragonés. Nos armamos de balor y nos presentamos, estando a primera begata en a istoria d'iste concurso que se presentaban leuturas en aragonés. 

Os alunnos, as mayestras Bea de seixeno, Raquel de zinqueno, a enfiladora d'o colechio, Luisa e yo mesma, nos baxamos ta tierra plana, a ro istituto Ramón y Cajal en Uesca con asabelo d'ilusión y con a sensazión d'haber feito un buen treballo.


Se presentaban  tres compañers de zinqueno ( Iván, Alba e Claudia) en castellano. A suya leutura libre teneba sabor aragonés, con " El rabadancito", istoria d'a bal de Tena y replegata en un marabilloso cuento de Sandra Araguás.

Os compañers de seixeno Miguel, María José e Mónica se presentoron en anglés!!!



A más balién, a mesacha de zinqueno, Inés Fernándes, se presentó con a leutura " O Espiello de Matsuyama" de Pol Campo Novillas d'o suyo libro Flor de Falordias, y a leutura obligatoria, "Santiago de Sanandrá u o chabalí blanco"  de Chesús Beltrán.


Lo fizon toz super bien. Como deziba Luisa, brilaron como estrelas! As nuestras estrelas!

A la fin, anque os rumors nos daban como ganadors, ganoron en a categoría de  Luengas Propias os compañers d'o colechio San José de Calasanz de Fraga con una leutura en catalán.

Qué imos a fer-le! Pero a nuestra Inés lo fizo tan bien que le ne dioron una Menzión d'Onor! y a posibilidá de presentar a fase autonomica en Zaragoza.

Os compañers de castellano si que ganoron a fase prebinzial, estando os millors de to'l Alto Aragón! Menudo tetulo! Brabo por ers!

Asinas que o sabado 2 d'abril nos baxamos ta Zaragoza a ra fase autonomica.





Nos lo pasamos asabelo de bien! Ista añada no ganamos pero asperaros a l'añada binien!!!












24 febrero 2017

SEMANA D'A LUENGA MATERNA 2017



21 DE FEBRER: DIYA D'A LUENGA MATERNA

Ista semanada se zelebra o diya d'a luenga materna y en o CEIP San Chuan de la Peña somos bulcatos con iste diya, y lo hemos alargato a una semanada entera. Hemos feito muitas cosas pa fer conziencia d'os problemas que tienen muitas luengas en o mundo, más que más, l'aragonés y a suya situazión como luenga menazata y minorizata

O Charraire, o nuestro corcho informatibo, s'ha plenato d'informazión, mapas y debuxos. 




Tanto os alunnos d'aragonés como toz os mayestros y ninos y ninas que pasan por iste pasaizo han puesto comprobar y aprender muitísmas cosas que no sapeban sobre a luenga d'Aragón y a suya situazión autual.

Como treballo colaborativo somos fendo dos cosas a nibel de colechio: 
  • Parolas d'o mundo en o cole!: ye un proyeuto ya presentato fa unas semanadas en o CIFE Ana Abarca de Boleya en Uesca. Replegatas totas as luengas maternas, tanto d'os alunnos como d'os pais d'o cole, dende a bisión de l'aragonés, somos fendo una replega de diferens campos semanticos de ideyas- parolas y a suya evoluzión seguntes a radiz filolochica d'as luengas, fendo un estudeo comparatibo.
  • Luen-ga: mayestros, alunnos, auxiliars, conseche, equipo direutivo... son replegando parolas en aragonés ta fer una luenga prou prou larga, tot lo más que se puda, que se beiga dende bien luen! 

Antimás 3 alunnos d'aragonés protagonizan o spot publizitario que s'ha feito ista añada ta zelebrar y o 21 de febrer. Podez veyer-lo abaixo. 




En clase, hemos chugato con PLICKERS y hemos resuelto una ripa de preguntas sobre a informazión d'O Charraire.  En prosimas dentradas tos contaré cómo funziona ista ferramienta 2.0. 

TREBALLANDO FIRME POR L'ARAGONÉS!

21 febrero 2017

GOYOSO SAN VALENTÍN

GOYOSO SAN VALENTÍN!

Ye un diya importan ta toz, más que más ta os chicorrons. Asinas que en o San Chuan de la Peña lo celebramos tamién! ( cualsiquier escusa ye buena ta fer fiesta, no?)

Hemos feito con as ninas y ninos de infantil y primero de primaria una tarcheta de felicitación ta ra presona que más queremos en o mundo mundial ! 






Ye prou fácil de fer. Primero pegamos en cada tarcheta un folio por a parti d'aintro, dimpués pentamos os debuxos de deban y de dezaga. Pegamos u pentamos  muitos güellos en a cara d'o monstruo.
  

O zaguer paso ye pegar bels corazons y meter una dedicatoria.



Tos dixo a plantilla por si querez fer-la:


Astí tos dixo bels exemplos d'os feitos por os ninons:






Tamién ye un diya importán ta ra nuestra luenga. Como deciba a nuestro amigo Oscar Latas en o documental Ambistas/Anvistas de Iris Campos Badrés ( que por cierto, no tos lo poder perder!), a nuestra luenga no más saldrá d'a suya situación con amor, AMOR A RA NUESTRA LUENGA! 


Asinas que goyoso San Valentin ta toz! y....goyoso díya, Aragonés!



12 febrero 2017

RICUERDOS D'O DIYA D'A LUENGA MATERNA 2016

            No quedan casi diyas ta o 21 de febrer, Diya Internacional d'a Luenga Materna y no pudo evitar remerar l'año pasato e como lo celebramos en o CRA Cinca Cinqueta. Plenamos a parete más gran d'o colechio de Plan con parolas en aragonés. Toz os ninos y ninas, mayestros y mayestras e incluso l'alcalde metimos paroletas bien pinchas. Bi habrá muros más conoxitos como os de Berlín u d'as Lamentacións... pero denguno tan polito!

Qué feremos istiaño en o CEIP San Chuan de la Peña de Chaca??
Ya soi con muitísmas ganas de enseñar-lo!  








11 febrero 2017

DEBINETAS



Cómo se tos dan as debinetas? y en aragonés??
Si tenez curiosidá, astí tenez un enlace a una nueva autividá ta prebar suerte en a aplicación Goconqr. Son unas tarchetas con diferens debinetas que has de chirar ta conoixer as rispuestas. Si sapez de beluna más podez dixar-la en os comentarios y la metere-mos en a coleución. Cuántas más, millor!



TARCHETAS DE DEBINETAS EN ARAGONÉS

10 febrero 2017

CHIP ARAGONÉS!



CAL CAMBIAR O CHIP!!!!! NO HAS SENTIU IXO NUNCA??

Cuan comencipian as clases en setiembre, os ninons encaran levan o chip d'o castellano. Cal romper con ixo y cómo millor que cambeando ixe chip y metendo-nos un atro...en aragonés

En a primera sesión d'o curso preparamos iste chip. Cada escolan@ y tamién a mayestra, en o mio caso, se fa un CHIP D'ARAGONÉS

Penta o centro como t'agane y as "patetas" d'o chip en amariello y royo, como a bandera d'Aragón. Metemos o nombre dezaga y lo plastificamos ta que nos faiga buena honra tot o curso. Ta rematar, femos un forau y metemos una laneta larga ta poder colgar-lo d'o cuello. 

Cuan plegamos, o primero de tot ye meternos o chip d'aragonés en o cuello ta ricordar-nos que podemos y debemos charrar en a nuestra luenga.

Aqui tos dixo o mio modelo pero podez trigar atros en a rete.

Aspero que tos cuaque!!





Tos dixo tamién, bels ixemplos de chips remataus.  


















17 abril 2014

RISPUESTAS A RAS DEBINETAS

AQUI YE O PPS CON AS RISPUESTAS A RAS DEBINETAS. NO SE PUEDEN SENTIR PERO SI BELUNO YE INTRESATO EN O PPS CON L'AUDIO QUE LO ME DIGA Y SE LO NIMBIO!! https://drive.google.com/file/d/0BxPXVkr8s2kWSllBZnlodVlhbjA/edit?usp=sharing